Суперлиганинг 2-туридан ўрин олган "Насаф" - "Металлург" (1:1) учрашувидан кейин ўтказилган матбуот анжуманида даставвал меҳмонлар жамоаси бош мураббийи Луисма Эрнандес журналистларни қизиқтирган саволларига жавоб қайтарди.

"Бугун жуда ҳам қийин ўйин бўлди. Шундай бўлишини олдиндан билгандик ва тайёргарлик кўргандик. Мавсумдаги илк ўйинимизни Ўзбекистоннинг энг кучли клубларидан бирига қарши ўтказдик. Йигитлар охиригача курашишди ва ирода кўрсатишди. Сўнгги дақиқаларда характер намойиш этиб, барчамизни хурсанд қилишди", - деди Луисма Эрнандес.

- "Насаф" ҳақида нима дея оласиз?
- Ўзбекистоннинг энг яхши жамоалардан бири деб биламан. Ўз ўйин услуби билан бошқалардан ажралиб туради.
- Ўйиндан олдин қандай натижа кутгандингиз?
- Учрашув оғир кечишини билардик. Иккала жамоа ўз мақсад вазифаси йўлида ишига профессионал тарзда ёндошди.
- Ўйин давомида жамоа сардорини алмаштирдингиз. Бунинг сабаби нимада?
- Фозил Мусаев ажойиб футболчи, фақат ўйин давомидаги тактик ўзгаришни амалга оширишимиз керак эди. Майдонга ўйин темпни ошириш учун янги кучларни ташладик.
- "Металлург" ўйин давомида тартибли ҳимояланди, гол ўтказиб юборгач, ҳужумга ўтди ва гол уришни ҳам уддалашини кўрсатди. Нима учун бугун ҳимоявий тактика танланди?
- Рақибга қараб тактика танлаймиз. Бугун кучли жамоага қарши ўйнаганлигимиз сабабли, қарши ҳужум тактикасига таяндик. Бу ўз самарасини берди. Урган голимиз танлаган тактикамиз самараси бўлди.
- Учрашувга 7 дақиқа қўшиб берилганига муносабатингиз қандай?
- Мен 4-5 дақиқа қўшиб берилса керак, деб ўйлагандим. Аммо ўйин давомида кўп тўхталишлар бўлди. Шу боисдан ҳам ҳакамнинг қарорига муносабатим ижобий.
- "Насаф"нинг ОЧЛдаги имкониятини қандай баҳолайсиз?
- Ўзбекистон футболини дунёга танитишда "Насаф"га омад тилайман.