"Бавария"нинг спорт директори Ҳасан Салиҳамиджич Амстердамнинг "Аякс" клуби ҳимоячиси Нуссер Мазрауининг ёзда немис жамоаси сафига текинга ўтишини тасдиқлади.
“Мазрауи бизга қўшилишга қарор қилди. Келишув якуний босқичда, тез орада ҳаммаси тайёр бўлади. Ҳамма бундан мамнун, у Европанинг топ-клубига ўтади", - дея Салиҳамиджичнинг сўзларини келтиради журналист Фабрицио Романо.
Манбанинг қўшимча қилишича, футболчи аллақачон тиббий кўрикдан ўтган, шундан сўнг у "Бавария" билан шартнома имзолаган. Яқин кунларда трансфер расман тасдиқланиши кутилмоқда.
