УЕФА президенти Мишель Платини нима учун ташкилот "молиявий фэйр-плей"га клублар амал қилиш кераклигини, Англиянинг "Манчестер Сити" клуби мисолида яна бир бор тушунтириб ўтди.
"Молиявий фэйр-плей жамоаларни инқироздан сақлаб қолиш учун жорий қилинган. Бу қоида клубларни ҳимоя қилишга қаратилган. Масалан, "Манчестер Сити"ни олайлик, жамоада айни пайтда ишлар аъло даражада. Чунки улар жуда кўп пул сарфлашаяпти. Аммо, бир кун келиб, жамоа хўжайинлари клубни тарк этишса, унда нима бўлади?!. Мна шу нарсаларни ҳам ёддан чиқармаслик керак", - дейди Платини Sky Sports нашрига берган интервьюсида.
"УЕФА томонидан жорий қилинган молиявий фэйр-плей қоидаларига кўра, 2013-14 йилги мавсумдан бошлаб, клублар сарфлаётган пул, улар топаётган даромаддан ошиши мумкин эмас.
Ушбу қоидага амал қилмаган клубларга эса, УЕФА томонидан санкциялар жорий қилинади. Ташкилот жорий қилган қоидаларга бўйсунмаган клублар еврокубокларда иштирок этиш имкониятидан маҳрум қилинадилар ва катта миқдорда жаримага тортиладилар.
