Ўзбекистон U-23 терма жамоаси бугун Осиё кубоги чорак финали доирасида Ироққа қарши ўйин ўтказади. Ироқ термаси техник директори Саъд Ҳафиз бугун бўлиб ўтадиган ўйин олдидан ўз фикрини билдириб ўтди.

"Жамоамиз Ўзбекистонга қарши бўладиган ўйинга тайёргарликни якунлади. Ўйинчилар ғалаба қозонишга ва кейинги босқичга чиқишга тайёр.

Бизни қийин ўйин кутиб турибди. Ўзбекистон термаси техник жиҳатдан мусобақадаги энг яхши жамоа ҳисобланади. Аммо биз бу рақибни мағлуб этиш учун керакли тактикани ишлаб чиқдик.

Ярим ҳимоячимиз Александр Аораҳа ("Куинз Парк Ренжерс" футболчиси — stadion.uz изоҳи) жароҳатидан фориғ бўлиб, машғулотларда иштирок этмоқда. Унинг Ўзбекистонга қарши ўйинда иштирок этиши учун тиббиёт штабининг якуний қарорини кутяпмиз.

Биз барча ўйинчиларни техник, жисмоний ва руҳий жиҳатдан яхши тайёрладик. Мезбон жамоани мағлуб этиб, ироқлик футбол мухлисларини хурсанд этишни ва мусобақада ғолиб чиқишни истаймиз", — деди Саъд Ҳафиз.