O‘zbekiston U-23 terma jamoasi bugun Osiyo kubogi chorak finali doirasida Iroqqa qarshi o‘yin o‘tkazadi. Iroq termasi texnik direktori Sa’d Hafiz bugun bo‘lib o‘tadigan o‘yin oldidan o‘z fikrini bildirib o‘tdi.

"Jamoamiz O‘zbekistonga qarshi bo‘ladigan o‘yinga tayyorgarlikni yakunladi. O‘yinchilar g‘alaba qozonishga va keyingi bosqichga chiqishga tayyor.

Bizni qiyin o‘yin kutib turibdi. O‘zbekiston termasi texnik jihatdan musobaqadagi eng yaxshi jamoa hisoblanadi. Ammo biz bu raqibni mag‘lub etish uchun kerakli taktikani ishlab chiqdik.

Yarim himoyachimiz Aleksandr Aoraha ("Kuinz Park Renjers" futbolchisi — stadion.uz izohi) jarohatidan forig‘ bo‘lib, mashg‘ulotlarda ishtirok etmoqda. Uning O‘zbekistonga qarshi o‘yinda ishtirok etishi uchun tibbiyot shtabining yakuniy qarorini kutyapmiz.

Biz barcha o‘yinchilarni texnik, jismoniy va ruhiy jihatdan yaxshi tayyorladik. Mezbon jamoani mag‘lub etib, iroqlik futbol muxlislarini xursand etishni va musobaqada g‘olib chiqishni istaymiz", — dedi Sa’d Hafiz.