Душанбедан қайтиш Марказий Осиёнинг уч клубида турлича бўлди. Энг яхшиси ва қулайи бизда.

Душанбе-Тошкент рейси борлиги учун Туркманистон, Қирғизистон, Ўзбекистон клублари айнан шу рейсдан фойдаланди. "Сўғдиёна"ни 45 дақиқалик парвоздан кейин Тошкентда автобуси кутиб олди ва жамоани Жиззахга олиб кетди. Қирғизистон футболчилари қийналишди. Улар Тошкентга келиб, машиналар билан Андижон-Ўш орқали йўлга чиқиб кетишди. Туркманистонлик футболчилар эса поездда Бухорога, кейин шу орқали автобусда мамлакатга кириб кетишлари режалаштирилган.

Қўшни республикаларни бир-бири билан боғлайдиган рейслар қанча кўп бўлса, шунча яхши албатта. Шундай вақтларда айтайлик Малайзия ва Индонезияни боғлайдиган рейсларга ҳавасинг келади. Ёки қўшни республикаларга машинада ўтиб бориш қийинчиликсиз бўлса, йўллар равон бўлса ҳам майли.

"Сўғдиёна" Душанбеда сунъий майдонда 3 та ўйин ўтказди. 3 та ўйинда 3 та ғалабага эга чиқди. Унинг бахтига рақобатчилари Coca-cola Суперлигада кетма-кет очко йўқотиб турди. Биринчи даврадан кейин ҳеч ким катта фарқ билан ўзиб кетмади. "Қизилқум" ҳам бунга йўл қўймади. Иккинчи давра ёнишига шубҳа йўқ. "Қизилқум" ҳам ростмана ўзгарганини исботламоқчи бўлса, иккинчи даврада ҳам шундай ўйнаши керак. Чунки аввалгисини энди одамлар яхши танийди. Чемпионат охиригача эркакча давом этишидан манфаатдормиз.

Диёр Имомхўжаев.