Dushanbedan qaytish Markaziy Osiyoning uch klubida turlicha bo‘ldi. Eng yaxshisi va qulayi bizda.

Dushanbe-Toshkent reysi borligi uchun Turkmaniston, Qirg‘iziston, O‘zbekiston klublari aynan shu reysdan foydalandi. "So‘g‘diyona"ni 45 daqiqalik parvozdan keyin Toshkentda avtobusi kutib oldi va jamoani Jizzaxga olib ketdi. Qirg‘iziston futbolchilari qiynalishdi. Ular Toshkentga kelib, mashinalar bilan Andijon-O‘sh orqali yo‘lga chiqib ketishdi. Turkmanistonlik futbolchilar esa poyezdda Buxoroga, keyin shu orqali avtobusda mamlakatga kirib ketishlari rejalashtirilgan.

Qo‘shni respublikalarni bir-biri bilan bog‘laydigan reyslar qancha ko‘p bo‘lsa, shuncha yaxshi albatta. Shunday vaqtlarda aytaylik Malayziya va Indoneziyani bog‘laydigan reyslarga havasing keladi. Yoki qo‘shni respublikalarga mashinada o‘tib borish qiyinchiliksiz bo‘lsa, yo‘llar ravon bo‘lsa ham mayli.

"So‘g‘diyona" Dushanbeda sun’iy maydonda 3 ta o‘yin o‘tkazdi. 3 ta o‘yinda 3 ta g‘alabaga ega chiqdi. Uning baxtiga raqobatchilari Coca-cola Superligada ketma-ket ochko yo‘qotib turdi. Birinchi davradan keyin hech kim katta farq bilan o‘zib ketmadi. "Qizilqum" ham bunga yo‘l qo‘ymadi. Ikkinchi davra yonishiga shubha yo‘q. "Qizilqum" ham rostmana o‘zgarganini isbotlamoqchi bo‘lsa, ikkinchi davrada ham shunday o‘ynashi kerak. Chunki avvalgisini endi odamlar yaxshi taniydi. Chempionat oxirigacha erkakcha davom etishidan manfaatdormiz.

Diyor Imomxo‘jayev.