Madridning «Real» klubi prezidenti Florentino Peres «Bavariya» vingeri Maykl Olisening transferini amalga oshirish niyatida. «Qirollik klubi» rahbari tez orada fransuz futbolchisi uchun 150 million yevro taklif qiladi.

Taniqli insayder Fabrisio Romanoning ma’lumotlariga ko‘ra, Peres Oliseni aynan unda superyulduzlarga xos barcha fazilatlar mujassam deb hisoblagani uchun tanlagan: u yuqori sermahsullik va jozibali o‘yin namoyish etmoqda, shu sababli, Florentinoning fikricha, u tez fursatda «Santyago Bernabeu» muxlislarining yoqimtoyiga aylanadi. Shuningdek, «Bavariya» hujum chizig‘i yetakchisining o‘ziga xos mentaliteti ham alohida qayd etilgan — u ham yulduzlarga xos, ammo ijobiy ma’noda.

Ko‘rinishidan, Peres ushbu transferni amalga oshirish uchun katta pul sarflashga tayyor, biroq «Bavariya» o‘z futbolchisi bilan xayrlashish niyatida emas.