«Barselona»ning sobiq yarim himoyachisi Kevin-Prins Boateng Kataloniya klubiga o‘tish paytida Lionel Messi haqida aytgan gaplari haqiqatga to‘g‘ri kelmaganini tan oldi.

Boatengning ta’kidlashicha, u doimo «Real» muxlisi bo‘lgan va Krishtianu Ronalduga hayrat bilan qaragan.

— Matbuot anjumanida yolg‘on gapirishimga to‘g‘ri kelgan. «Las-Palmas»da o‘ynagan vaqtimda mendan eng yaxshi futbolchi kimligi haqida so‘rashganida Ronaldu deb javob berganman. Sevimli jamoam ham «Real» ekanini aytganman.

«Barselona» bilan shartnoma imzolaganimda esa mendan «Barsa» mening sevimli jamoam, Lionel Messi esa dunyoning eng yaxshi futbolchisi ekanini aytishni so‘rashdi. Aks holda u yerda o‘ynay olmaysan. Bu boshqa futbolchilar bilan ham sodir bo‘lgan.

Matbuot anjumanidagi birinchi savol ham shu bo‘ldi: «Dunyoning eng yaxshi futbolchisi kim?» Men esa: «Lionel Messi», deb javob berdim. Men yolg‘on gapirganman, — deb yozdi Boateng ijtimoiy tarmoqda.

Ushbu bayonotga Krishtianu Ronaldu ham munosabat bildirib, post ostida to‘rtta kulgi emodzisini qoldirdi.