«Барселона»нинг собиқ ярим ҳимоячиси Кевин-Принс Боатенг Каталония клубига ўтиш пайтида Лионель Месси ҳақида айтган гаплари ҳақиқатга тўғри келмаганини тан олди.

Боатенгнинг таъкидлашича, у доимо «Реал» мухлиси бўлган ва Криштиану Роналдуга ҳайрат билан қараган.

— Матбуот анжуманида ёлғон гапиришимга тўғри келган. «Лас-Пальмас»да ўйнаган вақтимда мендан энг яхши футболчи кимлиги ҳақида сўрашганида Роналду деб жавоб берганман. Севимли жамоам ҳам «Реал» эканини айтганман.

«Барселона» билан шартнома имзолаганимда эса мендан «Барса» менинг севимли жамоам, Лионель Месси эса дунёнинг энг яхши футболчиси эканини айтишни сўрашди. Акс ҳолда у ерда ўйнай олмайсан. Бу бошқа футболчилар билан ҳам содир бўлган.

Матбуот анжуманидаги биринчи савол ҳам шу бўлди: «Дунёнинг энг яхши футболчиси ким?» Мен эса: «Лионель Месси», деб жавоб бердим. Мен ёлғон гапирганман, — деб ёзди Боатенг ижтимоий тармоқда.

Ушбу баёнотга Криштиану Роналду ҳам муносабат билдириб, пост остида тўртта кулги эмодзисини қолдирди.