«Гуарани» клуби Парагвай чемпионати олтин медалини ўта кулгили ва аламли тарзда қўлдан чиқарди. Бунда жамоа дарвозабонининг ортиқча хатти-ҳаракати қимматга тушди. У ҳал қилувчи учрашув якунида майдоннинг рақибга тегишли ҳудудига чиқди ва... Нега, ўзи нима бўлди? Қуйидаги мақолада шу воқеа тафсилотларига алоҳида тўхталамиз...
Парагвай чемпионатининг навбатдаги мавсуми чиндан ҳам, одамни ақлдан оздирадиган ҳолатда якунланди. «Серро Портеньо» клуби охирги тур олдидан «Гуарани»дан 2 очко олдинда эди ва ҳал қилувчи баҳсда айнан асосий рақиб майдонида меҳмон бўлди. Ўйиннинг асосий воқеалари:
*** «Серро» футболчиларидан бири 15-дақиқадаёқ қизил карточка олди ва жамоа майдонда озчилик бўлиб қолди.
*** «Гуарани» 90-дақиқада ҳам 2:0 ҳисобида олдинда бораётганди. Чемпионлик ҳар қачонгидан ҳам яқин. Мезбонларни олтин маррадан ҳакам қўшиб берган 6 дақиқа ажратиб турарди.
*** «Гуарани» футболчиларидан бири жароҳатланиб, майдондан чиқиб кетди. Бироқ мезбон жамоа дарвозабони майдоннинг иккинчи ярмига бориб, уни судраганча ортга қайтарди - мақсад вақтдан ютиш. Бунинг оқибатида футболчилар ўртасида тортишув юзага келди.
*** Ҳакам якунда дарвозабонни ҳам, жароҳатланган футболчини ҳам спортчиларга хос бўлмаган хатти-ҳаракат учун майдондан четлаштирди. Хуллас, «Гуарани» 9 киши билан қолди, боз устига, захира им-конияти тугаганди ва дарвозага майдон ўйинчиларидан бири турди.
*** «Серро» 90+9 ва 90+11-дақиқаларда 2та гол урди.
*** 2:2 ва «Серро» чемпион! Шунчаки, ақлни шоширадиган якун.
*** «Серро Портеньо» ўзининг «Твиттер»даги саҳифасида аллақачон сўнгги дақиқалар, сониялар ва иккинчи гол муаллифини абадийлаштиришга улгурди.
*** «Гуарани» охирги марта 2016 йили (Клаусура), «Серро» эса 2017 йили (Клаусура) чемпионликни нишонлаганди. Энди амалдаги чемпионда 34та олтин медаль бор. Тўғри, Парагвай рекордчиси «Олимпия» ҳали анча узоқда - бу клуб 45 карра чемпион!
