Бугун Туркиянинг "Фотиҳ Карагумрук" клуби билан шартнома имзолаган  Отабек Шукуров, эндиликда ўзининг собиқ жамоасига айланган «Шаржа»га хайрлашув мактубини ёзди.

"Бундан 5 йил аввал "Шаржа" сафига қўшилганимда, сиз менга бунчалар меҳр ва муҳаббат кўрсатишингизни тасаввур қилмагандим. Сиз менга ўз оила аъзоингиздек муносабатда бўлдингиз.

Жароҳатдан кейинги энг оғир паллада мен билан бирга бўлдингиз ва оёққа туришимга ёрдам бердингиз. "Шаржа" футболкасини кийиш мен учун шарафли бўлди ҳамда меҳрингизга муносиб жавоб қайтариш учун қўлимдан келган барча ишни қилишга интилдим. Бунинг учун ҳар бир машғулот ва ўйинда сидқидилдан меҳнат қилдим. Кубок ва чемпионатдаги ғҳолиблик ҳаётимдаги энг ёрқин хотиралар бўлиб қолади.

Жамоадошларим мавсум-2022/2023да ҳам сизга ана шундай ҳиссиётларни тақдим этишига ишонаман. Мен уларни чин юракдан қўллаб-қувватлашда давом этаман.

Бугун мен кўзда ёш билан жамоани тарк этяпман. Клуб президенти, мураббийлари, менежерлари, жамоадошларим ва клуб ходимлари, шунингдек, БААдаги фаолиятим давомида мен билан ёнма-ён турган "Шаржа" мухлисларига чин қалбдан миннатдорчилик билдираман.

Ҳамиша қалбимда қоласиз, менинг Қиролларим", — дея ёзди Шукуров ўз хатида.