Хабарингиз бор, бугун Россия Федерациясининг Владивосток шаҳрида “Осиё болалари-2022” халқаро спорт ўйинларига старт берилди. Дастлабки куни спортнинг бешта тури бўйича мусобақалар ўтказилмоқда ва улардан фақатгина сузиш баҳсларида медаллар ўйналмоқда.

Қувонарлиси, сузиш бўйича бўлиб ўтган мусобақаларда ҳамюртимиз ҳам совриндорлар сафидан ўрин эгаллади. 200 метр масофага баттерфляй усулида сузиш бўйича ўтказилган мусобақада Ўзбекистон ёшлар терма жамоаси аъзоси Асадбек Абдумаликов белгиланган масофани 2:07.94 сонияда сузиб ўтиб, маррага иккинчи бўлиб етиб келди.

Шу тариқа, Асадбек “Осиё болалари – 2022” халқаро спорт ўйинларида Ватанимиз шарафини ҳимоя қилаётган спортчилар орасида биринчи бўлиб шоҳсупага кўтарилди.

“Бугун мен 200 метр масофага баттерфляй усулида сузиш бўйича ўтказилган мусобақада кумуш медаль совриндори бўлдим. Албатта, ушбу натижани қўлга киритиш осон бўлмади. Сабаби, финал босқичида стартга кутилганидек жуда кучли рақиблар чиқишди. Мана шундай кучли рақобат остида кечган мусобақада совриндор бўлганимдан хурсандман, албатта. Бу учун энг аввало Давлатимиз ва ҳукуматимиз, шунингдек, бизга муносиб тайёргарлик кўришимиз учун зарур барча шароитларни яратиб берган Ўзбекистон Республикаси спортни ривожлантириш вазирлиги, Миллий Олимпия қўмитаси ҳамда Республика сузиш федерацияси раҳбариятига миннатдорлик билдираман. Мен яна 100 метр масофага баттерфляй усулида сузиш бўйича ўтказиладиган мусобақада қатнашаман ва мазкур мусобақада ҳам совриндор бўлишни мақсад қилганман”, — дейди Асадбек Абдумаликов.

Биз ҳам ўз навбатида “Осиё болалари – 2022” халқаро спорт ўйинларида Ватанимиз шарафини ҳимоя қилаётган барча спортчиларимизга омад ва зафарлар тилаб қоламиз.