Осиё футбол конфедерацияси ЖЧ-2026 ва Осиё кубоги-2027 қўшма саралаш босқичи форматини эълон қилди. Эслатиб ўтамиз, 2026 йилги Мундиал учун Осиёга 8+1 кўринишида квота ажратилган. Қитъа чемпионатида эса 24та жамоа иштирок этади.

Мазкур саралаш кампанияси 4та босқичдан иборат бўлади. Улар ҳақида тўхталиб ўтамиз.

Биринчи босқич
ФИФА рейтингида энг қуйи поғонани эгаллаб турган 22та терма жамоадан қуръа орқали 11та жуфтлик ҳосил қилинади. Улар уй ва сафар тизимида ўзаро тўқнаш келишади. Ғолиб жамоалар иккинчи босқичга йўл олишади. Бу босқич 2023 йилнинг октябрь ойида ўтказилади.

Иккинчи босқич
Рейтингда юқори 25та ўринни эгаллаган жамоалар ва 1-саралаш босқичидан ўтган 11та жамоа — жами 36та жамоа иккинчи босқичда иштирок этишади. Улар қуръа орқали 9та гуруҳга бўлинади. Учрашувлар икки даврада ўтказилади. Гуруҳларда дастлабки 2та ўринни эгаллаган жамоалар учинчи босқичга йўлланмасини қўлга киритади. Мазкур 18та жамоа Осиё кубоги-2027 йўлланмасини ҳам қўлга киритади. Ушбу босқич ўйинлари 2023 йилнинг ноябрь ойидан 2024 йилнинг июнь ойига қадар бўлган муддатда ташкил этилади.

Учинчи босқич
18та жамоа қуръа ёрдамида 3та гуруҳга тақсимланади. Ҳар бир гуруҳда олтитадан жамоа ўрин олади. Уй-сафар тизимида ўйинлар ўтказилади. Гуруҳларда дастлабки 2та ўринни эгаллаган жамоалар — жами 6та терма ЖЧ-2026 йўлланмасини қўлга киритади. Ушбу босқич 2024 йил сентябрь ойидан бошлаб 2025 йил март ойигача бўлган муддатда ўтказилади.

Тўртинчи босқич
Учинчи босқичда гуруҳларда 3 ва 4-ўринни эгаллаган терма жамоалар (жами 6та жамоа) тўртинчи босқичда 2та гуруҳга ажратилади. Ўйинлар фақат бир даврали тизимда ўтказилади. Гуруҳ ғолиблари тўғридан-тўғри ЖЧ-2026 йўлланмасини қўлга киритади. Иккинчи поғонани банд этганлар эса қитъалараро плей-офф йўлланмаси учун ўзаро кураш олиб боришади. Ушбу босқич баҳслари 2025 йилнинг ноябрь ойига белгиланган.

Осиё кубоги-2027 саралаш босқичи
Ушбу мусобақанинг 18та ўрни қандай аниқланиши ҳақида юқорида маълумот бериб ўтдик. Қолган 6та йўлланма эгалари 2та босқичда аниқланади. ЖЧ-2026 саралашининг дастлабки босқичида ютқазган 11та жамоадан 10таси ўзаро жуфтлик ҳосил қилади ҳамда плей-офф орқали 5та жамоа кейинги босқичга йўл олади. Улар орасида энг яхши натижага эга бўлган битта жамоа эса бевосита иккинчи босқичдан саралашга қўшилади.

Иккинчи босқич
ЖЧ-2026 иккинчи саралаш босқичида гуруҳларда 3 ва 4-ўринни эгаллаган жамоалар (жами 18та) сафига юқоридаги 6та жамоа қўшилади. 24та жамоа 6та гуруҳга бўлинади. Гуруҳ ғолиблари Осиё кубоги-2027 йўлланмасини қўлга киритади.