"Манчестер Сити"нинг кот-д'ивуарлик футболчиси Коло Туре бўйдоқлик билан видолашди. Чунки ёши 31 ни уриб қўйган, унинг устига уйдагилар ҳам қисташаётганди. У бир неча йил олдин кўз остига олиб қўйган севгилиси Шимен Акассуга уйланишга қарор қилди.
Улар бир ёстиққа бош қўйишга шошишмади, олдин роса синаншишди, ҳатто бу орада икки фарзандли бўлишди. Лекин тўй оқшоми "тўймисан тўй" таърифига мос бўлди ўзиям. Коло Туренинг "Манчестер Сити"даги кўплаб дўстлари тўйга бора олишмади. Чунки улар ҳозир Евро-2012 да иштирок этишмоқда. Лекин тўйда куёвжўрани Африкадаги дўстлари ва курсдошлари ёлғизлатиб қўйишмади. Айниқса, термадаги шериги Эмануэль Эбуэ миллий либосда келиши ҳамманинг диққатини ўзига жалб қилди.