"Барселона" ярим ҳимоячиси Френки де Йонг ҳамон "Манчестер Юнайтед"нинг эътиборида турибди. Журналист Роб Доусоннинг сўзларига кўра, “қизил иблислар” кейинги ёзда нидерландиялик футболчини қўлга киритиш учун яна бир уриниб кўради.
Эслатиб ўтамиз, де Йонг ўтган ёзда "Манчестер Юнайтед"га ўтиши мумкин эди, аммо якунда у "Барселона"да қолишни истагани учун кетишдан бош тортди. Шу билан бирга, "қизил иблислар" ярим ҳимоячи учун тахминан 90 миллион евро тўлашга тайёр эди.
Де Йонгга аввалроқ Лондоннинг “Челси” клуби ҳам қизиқиш билдираётган эди. Де Йонгдан ташқари, "Манчестер Юнайтед" келаси ёзда Дортмунднинг "Боруссия" клубидан Жуд Беллингемни ҳам сотиб олмоқчи. Беллингемнинг нархи 150 миллион еврога баҳоланмоқда.
