Ўзбекистон чемпионати Олий лигасида тўп сурадиган барча жамоалар сингари Тошкентнинг "Локомотив" клуби ҳам 2-давра ўйинларига қизғин тайёргарлик кўрмоқда. Шу билан бирга темирйўлчилар таркибни кўчайтириш мақсадида селекция ишларига ҳам жиддий эътибор қаратишган. Жамоа машғулотларида қатнашаётган янги футболчиларни кўздан кечириш мақсадида назорат-синов учрашувлари ташкил этилмоқда. Жумладан, кеча "Локомотив" жамоаси аъзолари ТТЙМИ стадионида 1-лига вакили "Оқтепа"га қарши ўртоқлик учрашувида куч синашди.

Мазкур ўйинда темирйўлчилар жамоасида бир қатор янги футболчилар кўздан кечирилди. Кутилмаганда 1-лига вакили учрашувни кўтаринки руҳда бошлади ва ўйин дебютидаёқ Артур Парвановни доғда қолдиришди. Бунга ўз туғилган кунига муносиб совға тайёрлаган Аюбхон Нўъмонов узоқдан йўллаган кучли ва аниқ, чиройли голи билан жавоб қайтарди. Бўлим охирларида Садриддин Абдуллаевнинг ажойиб тўп узатишидан сўнг рақиб дарвозабони билан бирга-бир вазиятга чиқиб борган Николай Гурянов ҳисобни 2-1га етказди. Бироқ, "Оқтепа" жамоаси сира ҳам бўш келишни истамасди ва улар тезда ҳисобни тенглаштирди. 2-тайм бошларида Абдуллаев ўзи бошлаган ҳужумни самарали якунлаб, ҳисобни 3-2га етказди. Лекин, ҳимоядаги қўпол хато натижасида темирйўлчилар ўз дарвозаси томон 11 метрлик жарима зарбаси ушлаб олишди ва рақиблар ушбу қулай имкониятни голга айлантиришди.

Орадан кўп ўтмай бош ҳакам "Локо" дарвозасига пенальти белгилади. Аммо, "Локомотив"нинг собиқ вакили Алишер Шоғуломов томонидан берилган зарба ноаниқ чиқди. Шундан сўнг ташаббусни ўз қўлига олган темирйўлчилар ўйин охиригача рақиб дарвозасини яна уч бора ишғол этишди. Голларга Бобур Тиллабоев ва жамоада кўрикдан ўтаётган Фирдавс Асадов 2 гол билан муаллифлик қилдилар. Якуний ҳисоб 6-3, "Локомотив" фойдасига.