Мадриднинг "Реал" клуби ёзги трансферлар ойнасида икки нафар дарвозабонни ўз сафига қўшиб олиш имкониятини рад этган. Бунга клуб раҳбариятининг Тибо Куртуага бўлган ишончи сабаб бўлган.
Бу ҳақда таниқли инсайдер Фабрицио Романо хабар бермоқда.
Манба маълумотига кўра, икки нафар дарвозабоннинг вакиллари "қироллик клуби" билан боғланиб, ўз мижозларини таклиф қилган. Бироқ мадридликлар янги голкиперларни жалб қилишга қизиқиш билдирмаган.
"Бизда дунёнинг энг яхши дарвозабони бор", — дея жавоб қайтарган "Реал" раҳбарияти.
Қайд этилишича, футболчиларнинг агентлари Мадрид клубининг дарвозабонлар билан боғлиқ узоқ муддатли режаларидан хабардор бўлган. Шунга қарамай, "Реал" Куртуага ишонч билдиришни давом эттириб, муқобил вариантларни кўриб чиқишни истамаган.
Сўнгги хабарларга кўра, бельгиялик дарвозабон яқин орада клуб билан шартномасини узайтириши кутилмоқда. Томонлар ҳамкорликни 2028 йил июнь ойига қадар давом эттириш бўйича дастлабки келишувга эришган.
Эслатиб ўтамиз, Тибо Куртуа 2018 йилда Лондоннинг "Челси" клубидан "Реал"га кўчиб ўтган эди.
Шундан буён бельгиялик голкипер мадридликларнинг асосий футболчиларидан бирига айланиб, жамоанинг Испания ва Европа миқёсидаги нуфузли совринларни қўлга киритишига катта ҳисса қўшиб келмоқда.
