Madridning "Real" klubi yozgi transferlar oynasida ikki nafar darvozabonni o‘z safiga qo‘shib olish imkoniyatini rad etgan. Bunga klub rahbariyatining Tibo Kurtuaga bo‘lgan ishonchi sabab bo‘lgan.

Bu haqda taniqli insayder Fabrisio Romano xabar bermoqda.

Manba ma’lumotiga ko‘ra, ikki nafar darvozabonning vakillari "qirollik klubi" bilan bog‘lanib, o‘z mijozlarini taklif qilgan. Biroq madridliklar yangi golkiperlarni jalb qilishga qiziqish bildirmagan.

"Bizda dunyoning eng yaxshi darvozaboni bor", — deya javob qaytargan "Real" rahbariyati.

Qayd etilishicha, futbolchilarning agentlari Madrid klubining darvozabonlar bilan bog‘liq uzoq muddatli rejalaridan xabardor bo‘lgan. Shunga qaramay, "Real" Kurtuaga ishonch bildirishni davom ettirib, muqobil variantlarni ko‘rib chiqishni istamagan.

So‘nggi xabarlarga ko‘ra, belgiyalik darvozabon yaqin orada klub bilan shartnomasini uzaytirishi kutilmoqda. Tomonlar hamkorlikni 2028 yil iyun oyiga qadar davom ettirish bo‘yicha dastlabki kelishuvga erishgan.

Eslatib o‘tamiz, Tibo Kurtua 2018 yilda Londonning "Chelsi" klubidan "Real"ga ko‘chib o‘tgan edi.

Shundan buyon belgiyalik golkiper madridliklarning asosiy futbolchilaridan biriga aylanib, jamoaning Ispaniya va Yevropa miqyosidagi nufuzli sovrinlarni qo‘lga kiritishiga katta hissa qo‘shib kelmoqda.