23 ноябрь куни жаҳон чемпионати гуруҳ босқичининг 1-тур учрашуви бўлиб ўтди ва унда Испания терма жамоаси Коста-Рикани 7:0 ҳисобида мағлуб этди. Opta Sport статистик портали маълумотларига кўра, "қизил фурия" қўшимча бўлимли ўйинларни ҳисобга олмаганда, жаҳон чемпионати ўйинида 1000 дан ортиқ пас берган биринчи жамоа бўлди.

Испания терма жамоаси ҳар бир учрашувда аниқ узатмалар (976 та) ва тўпга эгалик қилиш (81,8%) бўйича ҳам рекорд ўрнатди. Тўпни аниқ назорат қилиш эвазига испаниялик футболчилар Коста-Рика футболчиларига ўз дарвозаси томон бирорта ҳам зарба йўллашга имкон бермади.

Йирик ғалаба эвазига Испания уч очкога эга бўлди ва “E” гуруҳида биринчи ўринни эгаллаб турибди. Япония иккинчи (3), Германия учинчи (0), Коста-Рика эса тўртинчи (0) ўринда. Кейинги турда Испания Германия билан куч синашади. Ўйин 27 ноябрь куни, Тошкент вақти билан соат 23:59да бошланади.