23 noyabr kuni jahon chempionati guruh bosqichining 1-tur uchrashuvi bo‘lib o‘tdi va unda Ispaniya terma jamoasi Kosta-Rikani 7:0 hisobida mag‘lub etdi. Opta Sport statistik portali ma’lumotlariga ko‘ra, "qizil furiya" qo‘shimcha bo‘limli o‘yinlarni hisobga olmaganda, jahon chempionati o‘yinida 1000 dan ortiq pas bergan birinchi jamoa bo‘ldi.
Ispaniya terma jamoasi har bir uchrashuvda aniq uzatmalar (976 ta) va to‘pga egalik qilish (81,8%) bo‘yicha ham rekord o‘rnatdi. To‘pni aniq nazorat qilish evaziga ispaniyalik futbolchilar Kosta-Rika futbolchilariga o‘z darvozasi tomon birorta ham zarba yo‘llashga imkon bermadi.
Yirik g‘alaba evaziga Ispaniya uch ochkoga ega bo‘ldi va “E” guruhida birinchi o‘rinni egallab turibdi. Yaponiya ikkinchi (3), Germaniya uchinchi (0), Kosta-Rika esa to‘rtinchi (0) o‘rinda. Keyingi turda Ispaniya Germaniya bilan kuch sinashadi. O‘yin 27 noyabr kuni, Toshkent vaqti bilan soat 23:59da boshlanadi.
