Хабарингиз бор, 3 августдан бошлаб олий лиганинг 14-тур ўйинларига старт берилади.

Муборакнинг «Машъал» жамоаси иккинчи даврадаги илк учрашувини сафарда «Навбаҳор»га қарши ўтказади. Клуб расмий сайтининг хабар беришича, бугун футболчилар Наманганга жўнаб кетишди.

Эртага ҳар иккала клубнинг ўринбосарлари, индинга эса асосий таркиблар ўзаро беллашишади. Мазкур баҳсдан олдин клуб расмий сайти ўйинчиларнинг аҳволи қай даражада эканлигини билиш учун клуб шифокори Алишер Абдураҳмоновга мурожаат қилди.

«Футболчиларнинг ҳолати яхши,  - дейди Абдураҳмонов. - Ҳамма соғ-саломат. Ҳеч кимни жароҳат безовта қилаётгани йўқ. Давралар оралиғида Павел Соломинни ҳам таркибига қўшиб олмоқчи эдик. Бироқ у тиббий кўрикдан ўта олмади. Шу боис бу ҳужумчи ҳозирча таркибга қўшилгани йўқ. Кейинчалик нима бўлишини вақт кўрсатади», дея сўзини якунлади шифокор.