Кейлор Наваснинг "ПСЖ"дан "Бавария"га ўтиши бу қишда даргумон.
Эслатиб ўтамиз, Мюнхен клуби янги дарвозабон изламоқда, чунки таътилда чанғида учаётган Мануэль Нойер оёғини синдириб олди. 36 ёшли дарвозабон мавсум охиригача майдонга тушмайди.
Хабар қилинишича, Навас "Бавария" қизиқаётган футболчилар қаторида.
Kicker хабарига кўра, Кейлорнинг немис клубига ўтишига бир қанча сабаблар тўсқинлик қилмоқда.
Биринчидан, "ПСЖ" Чемпионлар лигасининг 1/8 финали ўйинлари олдидан рақибини кучайтирмоқчи эмас. Иккинчидан, Навас ҳам трансферга рози бўлмаса керак, чунки бу келишув мюнхенликлар учун фақат қисқа муддатли ечим бўлади. Учинчидан, "Бавария"да Кейлорнинг Германия чемпионатига тезда мослашишига шубҳа бор.
Навас "ПСЖ"нинг ўринбосар дарвозабони ва бу мавсумда ҳали клубда ўйнамаган. 2022 йилги жаҳон чемпионатида у Коста-Рика терма жамоаси сафида 3 та ўйин ўтказиб, 11 та гол ўтказиб юборган.
