Mарокаш ва Франция ўртасидаги ғолиб бўлган жамоа Аргентина билан финалда тўқнаш келадиган бўлди. Негаки, Месси бошчилигидаги жамоа кеча Хорватияни 3-0 ҳисобида доғда қолдирган эди. Дидье Дешам шогирдлари эса ярим-финалга Англияни мағлуб этиб чиқишган. Французларга қарши туриши керак бўлган Марокашнинг йўли эса анча оғир эди. Улар бир қатор турнирнинг гигант жамоаларини мағлуб қилди. "Атлас шерлари" мундиалнинг ҳозирги қисмига қадар фақат битта гол ўтказиб юборган. У ҳам бўлса, автогол эди. Эътиборлиси, бу жамоа иккита пенальтилар сериясида бирорта гол ўтказмаганидир.
Хаким Зиеш ва унинг шериклари жаҳон чемпионларига қарши курашиши керак бўлади. Бир пайтлар, йигирманчи аср бошида Франция империяси Марокашни босиб олган. Бугун қасос онлари келди ва олдинда жуда муҳим учрашув ва рақиб кутмоқда. Валид Реграри шогирдларининг турнирдаги қаҳрамонликлари тарихда қоладиган бўлди.
Қуйида бу икки жамоанинг ярим-финалгача қандай йўлни босиб ўтгани муҳокама қилинади.
Улар қандай етиб келишди?
Франция биринчи турда Австралияни 4-1 ҳисобида мағлуб қилди. Иккинчи ўйин эса Данияга қарши 2-1 билан французлар фойдасига якун топди. Аммо сўнгги тур кутилмаганда Тунисга кичик, 1-0 ҳисобидаги мағлубият билан якунланди. Нимчорак финалдаги Польша билан ўйин 3-1 билан Франция фойдасига ҳал бўлди. Навбатдаги босқич эса Англия билан бўлиб ўтди ва бу тўсиқ ҳам уч ранглиларга ғов бола олмади.
Марокаш турнирни Хорватияга қарши нурсиз дуранг билан бошлади. Аммо кейинги Бельгия ва Канадага қарши баҳслар ғалаба билан якун топди (2-0, 2-1). Нимчорак финал испанлар билан кечди ва унда ҳисоб очилмади. Пенальтилар серияси эса 3-0 ҳисобидаги ғалаба билан марокашликлар фойдасига ҳал бўлди. Португалия тўсиғи чорак-финалда битта гол билан ҳал қилинди. Шундай қилиб, Марокаш Африкадан бўлган илк ярим финалчига айланди.
Жамоалар олдин тўқнашганми?
Франция Марокашга қарши умумий ҳисобда 7-3 билан устунлик қилмоқда. Жамоалар бир бор дуранг ўйнаган. Марокаш эса бир марта, 1963 йилда ўзининг собиқ мустамлакачиси устидан ғалабага эришганди. Юқорида айтилган дуранг 2007 йилнинг ноябрида юз берган ва унда 2-2 ҳисоби қайд этилган.
Эслатиб ўтамиз, ярим финалнинг иккинчи ўйини "Ал-Байт" стадионида бўлиб ўтади. Баҳс старти маҳаллий вақт билан 22:00да, Ўзбекистон вақти билан эса 00:00да юз беради.
ИСМАТОВ Ж.
