Marokash va Fransiya o‘rtasidagi g‘olib bo‘lgan jamoa Argentina bilan finalda to‘qnash keladigan bo‘ldi. Negaki, Messi boshchiligidagi jamoa kecha Xorvatiyani 3-0 hisobida dog‘da qoldirgan edi. Didye Desham shogirdlari esa yarim-finalga Angliyani mag‘lub etib chiqishgan. Fransuzlarga qarshi turishi kerak bo‘lgan Marokashning yo‘li esa ancha og‘ir edi. Ular bir qator turnirning gigant jamoalarini mag‘lub qildi. "Atlas sherlari" mundialning hozirgi qismiga qadar faqat bitta gol o‘tkazib yuborgan. U ham bo‘lsa, avtogol edi. E’tiborlisi, bu jamoa ikkita penaltilar seriyasida birorta gol o‘tkazmaganidir.
Xakim Ziyesh va uning sheriklari jahon chempionlariga qarshi kurashishi kerak bo‘ladi. Bir paytlar, yigirmanchi asr boshida Fransiya imperiyasi Marokashni bosib olgan. Bugun qasos onlari keldi va oldinda juda muhim uchrashuv va raqib kutmoqda. Valid Regrari shogirdlarining turnirdagi qahramonliklari tarixda qoladigan bo‘ldi.
Quyida bu ikki jamoaning yarim-finalgacha qanday yo‘lni bosib o‘tgani muhokama qilinadi.
Ular qanday yetib kelishdi?
Fransiya birinchi turda Avstraliyani 4-1 hisobida mag‘lub qildi. Ikkinchi o‘yin esa Daniyaga qarshi 2-1 bilan fransuzlar foydasiga yakun topdi. Ammo so‘nggi tur kutilmaganda Tunisga kichik, 1-0 hisobidagi mag‘lubiyat bilan yakunlandi. Nimchorak finaldagi Polsha bilan o‘yin 3-1 bilan Fransiya foydasiga hal bo‘ldi. Navbatdagi bosqich esa Angliya bilan bo‘lib o‘tdi va bu to‘siq ham uch ranglilarga g‘ov bola olmadi.
Marokash turnirni Xorvatiyaga qarshi nursiz durang bilan boshladi. Ammo keyingi Belgiya va Kanadaga qarshi bahslar g‘alaba bilan yakun topdi (2-0, 2-1). Nimchorak final ispanlar bilan kechdi va unda hisob ochilmadi. Penaltilar seriyasi esa 3-0 hisobidagi g‘alaba bilan marokashliklar foydasiga hal bo‘ldi. Portugaliya to‘sig‘i chorak-finalda bitta gol bilan hal qilindi. Shunday qilib, Marokash Afrikadan bo‘lgan ilk yarim finalchiga aylandi.
Jamoalar oldin to‘qnashganmi?
Fransiya Marokashga qarshi umumiy hisobda 7-3 bilan ustunlik qilmoqda. Jamoalar bir bor durang o‘ynagan. Marokash esa bir marta, 1963 yilda o‘zining sobiq mustamlakachisi ustidan g‘alabaga erishgandi. Yuqorida aytilgan durang 2007 yilning noyabrida yuz bergan va unda 2-2 hisobi qayd etilgan.
Eslatib o‘tamiz, yarim finalning ikkinchi o‘yini "Al-Bayt" stadionida bo‘lib o‘tadi. Bahs starti mahalliy vaqt bilan 22:00da, O‘zbekiston vaqti bilan esa 00:00da yuz beradi.
ISMATOV J.
