Аргентина терма жамоасининг собиқ ҳужумчиси Серхио Агуэро ижтимоий тармоқларда ЖЧ-2022 олдидан терма жамоадаги собиқ шериги Лионель Мессига пул тикканини маълум қилди.
Агуэро шу йилнинг 17 ноябрида қилган гарови акс этган скриншотни жойлаштирди. Собиқ футболчи Месси Қатардаги жаҳон чемпионатининг энг яхши футболчисига айланишига 1001 доллар тикди. Натижада Месси еттита гол урди, учта голли узатмани амалга оширди, Аргентина терма жамоаси билан биргаликда жаҳон чемпиони бўлди ва турнирнинг энг яхши футболчиси деб топилди. Бу гаров Агуэрога 8 264 доллар келтирди.
Эслатиб ўтамиз, Аргентина терма жамоаси турнирнинг финал учрашувида (3:3, пенальтилар бўйича 4:2) Франция терма жамоасини мағлуб этиб, ЖЧ-2022 ғолибига айланганди.
