Арсен Венгер клубдан кетганидан кейин биринчи марта "Арсенал" ўйинига ташриф буюрди.
The Athletic журналисти Девид Орнштейн хабарига кўра, 73 ёшли мутахассис АПЛнинг 17-тури доирасида "Арсенал" - "Вест Хэм" баҳсини (3:1) томоша қилиш учун "Эмирейтс" стадионига келган.
Бу Венгер 2018 йилда клубдан кетганидан кейин биринчи марта "канонирлар" ўйинига ташриф буюрди. Франциялик мутахассис 1996 йилдан 2018 йилгача "Арсенал"ни бошқарган. У клубни уч марта Премьер-лига чемпиони қилган. Жамоадан кетганидан кейин Венгер бошқа клублар билан ишламади. Ҳозир у ФИФАнинг глобал ривожланиш департаменти раҳбари.
