Пойтахтимиздаги "Яккасарой" спорт мажмуасида 15-16 ёшли болалар ўртасида "Футболимиз келажаги" анъанавий республика турнирининг финал босқичи бўлиб ўтди.
Ўзбекистон "Маҳалла" хайрия жамоат фонди, Маданият ва спорт ишлари вазирлиги, Болалар спортини ривожлантириш жамғармаси, футбол федерацияси ва "Камолот" ёшлар ижтимоий ҳаракати Марказий кенгаши томонидан ўтказилаётган "Футболимиз келажаги" анъанавий турнири ҳам маҳалла болалари ўртасида спортни, жумладан, футболни оммалаштиришга хизмат қилмоқда.
Болаларнинг ёзги таътилдаги бўш вақтини мазмунли ўтказишга қаратилган мазкур турнир бир неча ёш тоифасида ташкил этилмоқда. Бу йилги мусобақанинг 11-12 ёшли болалар ўртасидаги республика финал босқичида фарғоналик ёшлар ғалаба қозонган бўлса, 13-14 ёшли болалар ўртасида Қашқадарё вилояти футболчилари биринчи ўринни эгаллади.
15-16 ёшли болалар ўртасидаги финал босқичида Тошкент шаҳри Учтепа туманидаги "Ҳожиобод", Самарқанд вилояти Булунғур туманидаги "Булунғур", Фарғона вилояти Данғара туманидаги "Найманча", Сурхондарё вилояти Қумқўрғон туманидаги "Улуғбек" маҳаллалари футболчилари ғолиблик учун куч синашди.
Якунда барча учрашувларни муваффақиятли якунлаган тошкентлик ёш футболчилар биринчи ўринни қўлга киритди. Иккинчи ўрин Сурхондарё, учинчи ўрин эса Самарқанд вилояти жамоаларига насиб этди.
