"Ювентус" ярим ҳимоячиси Анхел ди Мария туринликлар сафини тарк этмоқчи эмаслигини айтди.

Эслатиб ўтамиз, аввалроқ Италия суди клубни молиявий фирибгарликда айблаб, "Ювентус"дан 15 очко олиб ташлашга қарор қилганди. Эндиликда туринликлар 23 очко билан А Серия турнир жадвалида 9-ўринда бормоқда.

"Мен ҳар доим оиламни ҳисобга олиб қарор қабул қиламан ва Туриндаги оилам бахтли. "Ювентус" - Италиядаги энг катта клуб, Европадаги асосий клублардан бири, биз ҳамма нарсадан мамнунмиз", - деди ди Мария Football Italia билан суҳбатда.

Эслатиб ўтамиз, ди Мария "кекса синьора" сафига ўтган ёзда келиб қўшилган эди, у аввалроқ "ПСЖ"да ўйнаган эди. Умуман олганда, 34 ёшли аргентиналик футболчи “бьянконерлар” сафида 14 та ўйин ўтказиб, 3 та гол урди ва 5 та голли узатмани амалга оширди.