"Барселона" Лионель Мессини ортга қайтармоқчи, аммо каталонияликлар келаси ёзда уни ортга қайтара олишлари ҳали аниқ эмас. Goal порталининг Mundo Deportivo нашрига таяниб хабар беришича, айни дамда Месси "кўк-анорранглилар" президенти Жоан Лапортадан қўнғироқни кутмоқда.
Қайд этилишича, Лапорта аллақачон Мессининг отаси билан мулоқот қилган, лекин футболчининг ўзи билан эмас. 35 ёшли аргентиналик юлдуз билан фақатгина "Барселона" бош мураббийи Хави алоқага чиққан.
Месси Лапорта билан суҳбатдан сўнг "Камп Ноу"га қайтиш ёки қайтмаслик ҳақида қарор қабул қилади. Аргентиналик футболчининг "ПСЖ" билан амалдаги шартномаси шу мавсум охиригача мўлжалланган.
