"Barselona" Lionel Messini ortga qaytarmoqchi, ammo kataloniyaliklar kelasi yozda uni ortga qaytara olishlari hali aniq emas. Goal portalining Mundo Deportivo nashriga tayanib xabar berishicha, ayni damda Messi "ko‘k-anorranglilar" prezidenti Joan Laportadan qo‘ng‘iroqni kutmoqda.
Qayd etilishicha, Laporta allaqachon Messining otasi bilan muloqot qilgan, lekin futbolchining o‘zi bilan emas. 35 yoshli argentinalik yulduz bilan faqatgina "Barselona" bosh murabbiyi Xavi aloqaga chiqqan.
Messi Laporta bilan suhbatdan so‘ng "Kamp Nou"ga qaytish yoki qaytmaslik haqida qaror qabul qiladi. Argentinalik futbolchining "PSJ" bilan amaldagi shartnomasi shu mavsum oxirigacha mo‘ljallangan.
