«Manchester Siti» va Norvegiya terma jamoasining yulduzli markaziy hujumchisi Erling Xoland faoliyatini boshqa klubda davom ettirishi mumkin. Bu haqda Madrid Universal nashri xabar bermoqda.
Skandinaviyalik to‘purar bosh murabbiy Xosep Gvardiola lavozimini tark etganidan keyin klubdagi o‘z kelajagiga to‘liq ishonmayapti. Xoland avvaliga jamoaning Enso Mareska boshqaruvidagi yangi loyihasi qanday ko‘rinish olishini kuzatadi, shundan so‘nggina yakuniy qarorga keladi.
Erlingning faoliyatini davom ettirishi mumkin bo‘lgan variantlar qatorida Madridning «Real» va Kataloniyaning «Barselona» klublari tilga olinmoqda. 25 yoshli to‘purar 2022 yilning yozidan buyon Angliya klubi sharafini himoya qilib kelmoqda. Uning amaldagi shartnomasi 2034 yil iyun oyi yakuniga qadar mo‘ljallangan bo‘lib, bozor qiymati 200 million yevroni tashkil etadi.
