«Barselona» vise-prezidenti Rafa Yuste «Atletiko» bosh direktori Migel Anxel Xilning Xulian Alvares bilan bog‘liq vaziyat yuzasidan bildirgan fikrlariga javob qaytardi.
Madrid klubi vakili kataloniyaliklarning harakatlarini sharhlar ekan, shunday degan edi:
«Biz yolg‘on, axloqsizlik va professionallik yetishmasligidan g‘azabdamiz. Hech qanday holatda «Barselona» bilan muzokara olib bormaymiz».
Yuste esa bu bayonotni keskin tanqid qildi.
«Bu so‘zlar qizil chiziqdan o‘tdi va ularni Migel Anxel Xil aytganini hisobga olsak, men buni umuman tushunmayman. Uning fikrlariga qo‘shilmasligimni aniq aytmoqchiman va, albatta, bu so‘zlar meni ham g‘azablantirdi.
Biz raqiblarimizni hurmat qiladigan klubmiz. «Atletiko»ni tashkilot sifatida hurmat qilamiz va dunyodagi barcha futbolchilarga chin ma’noda hurmat bilan munosabatdamiz. Agar biror futbolchi klubimizga o‘tishni istasa, bundan, albatta, mamnun bo‘lamiz», — dedi Yuste Movistar Plus efirida.
