«Барселона» вице-президенти Рафа Юсте «Атлетико» бош директори Мигель Анхель Хилнинг Хулиан Альварес билан боғлиқ вазият юзасидан билдирган фикрларига жавоб қайтарди.
Мадрид клуби вакили каталонияликларнинг ҳаракатларини шарҳлар экан, шундай деган эди:
«Биз ёлғон, ахлоқсизлик ва профессионаллик етишмаслигидан ғазабдамиз. Ҳеч қандай ҳолатда «Барселона» билан музокара олиб бормаймиз».
Юсте эса бу баёнотни кескин танқид қилди.
«Бу сўзлар қизил чизиқдан ўтди ва уларни Мигель Анхель Хиль айтганини ҳисобга олсак, мен буни умуман тушунмайман. Унинг фикрларига қўшилмаслигимни аниқ айтмоқчиман ва, албатта, бу сўзлар мени ҳам ғазаблантирди.
Биз рақибларимизни ҳурмат қиладиган клубмиз. «Атлетико»ни ташкилот сифатида ҳурмат қиламиз ва дунёдаги барча футболчиларга чин маънода ҳурмат билан муносабатдамиз. Агар бирор футболчи клубимизга ўтишни истаса, бундан, албатта, мамнун бўламиз», — деди Юсте Movistar Plus эфирида.
