Hujumchi Kilian Mbappe «Real»ni tark etishi mumkin. Bu haqda jurnalist Juan Juzes xabar berdi.
Manbaga ko‘ra, agar fransuz futbolchisining atrofidagilari shartnomani uzaytirish bo‘yicha muzokaralarni kechiktirayotgan bo‘lsa, buning sababi aniq: hujumchi hozirda Madrid klubining loyihasi inqirozda, deb hisoblamoqda.
Mbappe «Real» bilan shartnoma imzolayotganida tarixdagi eng talabchan klubga qo‘shilayotganini o‘ylagan. Biroq yakunda u shokka tushgan: Kilian jamoa ichida intizom va qattiqqo‘llik yetishmayotganini ko‘rmoqda. Uning fikricha, bunday holatni hatto «PSJ»da ham uchratmagan.
Mbappe mag‘lubiyatlarga befarq munosabatda bo‘layotgan bir nechta jamoadoshlarining xatti-harakatlaridan norozi.
Hujumchi «Real» prezidenti Florentino Peresdan tarkibni jiddiy ravishda yangilash va qattiq jazo choralarini joriy etishni talab qilmoqda.
Agar bu amalga oshmasa, Mbappe uzoq muddatli shartnomani imzolamasligi mumkin.
