Diario Sport ma’lumotiga ko‘ra, «Barselona» Hamza Abdelkarim bilan shartnoma shartlarini yaxshilashni rejalashtirayotgan bo‘lsa-da, uni joriy mavsumda zaxira jamoasi futbolchisi sifatida ro‘yxatdan o‘tkazib qolishni istamoqda.

Misrlik iqtidorli futbolchi mavsumoldi tayyorgarligida eng yaxshi o‘yin ko‘rsatgan futbolchilardan biri bo‘ldi. Bu esa kataloniyaliklarni uning maoshi va tovon puli miqdorini oshirish bo‘yicha muzokaralarni tezlashtirishga undadi.

Shunga qaramay, «Barselona» bosh murabbiyi Hansi Flik 18 yoshli futbolchiga asosiy jamoada muntazam o‘yin amaliyotini kafolatlay olmaydi. Buni Abdelkarimning La Ligadagi «Elche» va «Atletik»ka qarshi dastlabki ikki uchrashuvda maydonga tushmagani ham ko‘rsatib turibdi.

Biroq «Barselona» Abdelkarimning salohiyatiga katta ishonch bildirmoqda. Klub fikricha, zaxira jamoasida ishlash uning jismoniy tayyorgarligini yaxshilashiga va zaxira hamda asosiy jamoa o‘rtasida navbatma-navbat o‘ynab turishiga yordam beradi.

Flikning Rafinyani «soxta to‘qqizlik» sifatida o‘ynatish tajribasi hozircha yaxshi samara bermoqda. «Barselona» yozda yangi hujumchi xarid qilish rejasidan voz kechgani sabab, braziliyalik futbolchi hujum markazida asosiy nomzodlardan biriga aylanmoqda.

Shu sharoitda Abdelkarim Rafinyaning zaxira varianti sifatida ko‘proq o‘yin vaqti olishi mumkin.