Diario Sport маълумотига кўра, «Барселона» Ҳамза Абделкарим билан шартнома шартларини яхшилашни режалаштираётган бўлса-да, уни жорий мавсумда захира жамоаси футболчиси сифатида рўйхатдан ўтказиб қолишни истамоқда.

Мисрлик иқтидорли футболчи мавсумолди тайёргарлигида энг яхши ўйин кўрсатган футболчилардан бири бўлди. Бу эса каталонияликларни унинг маоши ва товон пули миқдорини ошириш бўйича музокараларни тезлаштиришга ундади.

Шунга қарамай, «Барселона» бош мураббийи Ҳанси Флик 18 ёшли футболчига асосий жамоада мунтазам ўйин амалиётини кафолатлай олмайди. Буни Абделкаримнинг Ла Лигадаги «Эльче» ва «Атлетик»ка қарши дастлабки икки учрашувда майдонга тушмагани ҳам кўрсатиб турибди.

Бироқ «Барселона» Абделкаримнинг салоҳиятига катта ишонч билдирмоқда. Клуб фикрича, захира жамоасида ишлаш унинг жисмоний тайёргарлигини яхшилашига ва захира ҳамда асосий жамоа ўртасида навбатма-навбат ўйнаб туришига ёрдам беради.

Фликнинг Рафиньяни «сохта тўққизлик» сифатида ўйнатиш тажрибаси ҳозирча яхши самара бермоқда. «Барселона» ёзда янги ҳужумчи харид қилиш режасидан воз кечгани сабаб, бразилиялик футболчи ҳужум марказида асосий номзодлардан бирига айланмоқда.

Шу шароитда Абделкарим Рафиньянинг захира варианти сифатида кўпроқ ўйин вақти олиши мумкин.