Пойтахтимизда ўтаётган бкос бўйича жаҳон чемпионатида энг енгил вазн тоифаси учун Ўзбекистон терма жамоаси таркибига қабул қилинган Шодиёр Мелиқўзиев ишончни оқламади.

Ҳамюртимиз нимчорак финал босқичида қозоғистонли Санжар Ташкенбайга қарши жанг олиб борди. Шодиёржон биринчи бўлимда тенг-тенг кураш олиб борди. Бу ҳакамларнинг баҳосида ҳам акс этди — 2:3. Аммо иккинчи ва учинчи раундлар Санжарнинг фойдасига ҳал бўлди. Ҳаттоки, Мелиқўзиев иккинчи бўлимда нокдаун ҳолатига ҳам тушди. Якуний натижа — 1:4.

Ушбу спортчилар январь ойида бўлиб ўтган 22 ёшгача бўлган боксчилар ўртасидаги Осиё чемпионати финалида ҳам тўқнаш келишган ва унда ҳам Ташкенбайнинг қўли баланд келганди.

Эслатиб ўтамиз, 48 кг. вазн тоифасида Ўзбекистоннинг айни пайтда энг яхши боксчиси Нодиржон Мирзааҳмедов ҳисобланади. У жаҳон чемпионати олдидан ўтказилган синов жангида Шодиёр Мелиқўзиевни мағлуб этганди. Аммо мураббийлар штаби Мелиқўзиевга имкон беришга қарор қилишди.