Poytaxtimizda o‘tayotgan bkos bo‘yicha jahon chempionatida eng yengil vazn toifasi uchun O‘zbekiston terma jamoasi tarkibiga qabul qilingan Shodiyor Meliqo‘ziyev ishonchni oqlamadi.

Hamyurtimiz nimchorak final bosqichida qozog‘istonli Sanjar Tashkenbayga qarshi jang olib bordi. Shodiyorjon birinchi bo‘limda teng-teng kurash olib bordi. Bu hakamlarning bahosida ham aks etdi — 2:3. Ammo ikkinchi va uchinchi raundlar Sanjarning foydasiga hal bo‘ldi. Hattoki, Meliqo‘ziyev ikkinchi bo‘limda nokdaun holatiga ham tushdi. Yakuniy natija — 1:4.

Ushbu sportchilar yanvar oyida bo‘lib o‘tgan 22 yoshgacha bo‘lgan bokschilar o‘rtasidagi Osiyo chempionati finalida ham to‘qnash kelishgan va unda ham Tashkenbayning qo‘li baland kelgandi.

Eslatib o‘tamiz, 48 kg. vazn toifasida O‘zbekistonning ayni paytda eng yaxshi bokschisi Nodirjon Mirzaahmedov hisoblanadi. U jahon chempionati oldidan o‘tkazilgan sinov jangida Shodiyor Meliqo‘ziyevni mag‘lub etgandi. Ammo murabbiylar shtabi Meliqo‘ziyevga imkon berishga qaror qilishdi.