Баскетбол бўйича Евролига 2022/23 йилги мавсумида “тўртлик финали” якунланди.

21 май куни Литванинг Каунас шаҳрида ўтказилган финал ўйинида “Реал Мадрид” Грециянинг “Олимпиакос”ини 79:78 ҳисобида мағлуб этди. Мадридликлар ўйин тугашига 3 сония қолганда 2 очколик аниқ улоқтириш орқали ғалабани илиб кетди.

Шу тариқа испан клуби 11 карра Евролига ғолибига айланди. Бу мусобақадаги рекорд натижа.

Евролига учинчи ўрини учун кечган баҳсда “Барселона” клуби “Монако”га ютқазиб қўйди (66:78).

“Реал Мадрид” бундан аввал 1964, 1965, 1967, 1968, 1974, 1978, 1980, 1995, 2015 ва 2018 йилларда ҳам ғолибликни қўлга киритганди.

Евролигада ғолиб чиқиш борасида кейинги ўринларда “ЦСКА Москва” (8), “Маккаби Тель-Авив”, “Панатинаикос” (6 тадан) ва “Варезе” (5) жамоалар туради.