Шанхай (Хитой)да теннис бўйича ўтказилаётган “Shanghai Rolex Masters” нуфузли халқаро турнирида ҳамюртимиз Денис Истомин асосий тўрнинг дастлабки учрашувида муваффақиятга эришди.
Аргентиналик Карлос Берлокка қарши кечган учрашувда Денис Истомин уч сет якунларига кўра 4-6, 6-2, 6-1 ҳисобида ғалаба қозониб, бош соврин учун курашни давом эттирмоқда.
Иккинчи босқичда Ўзбекистоннинг биринчи рақамли теннисчиси швейцариялик Станислас Вавринкага қарши кортга чиқади. Мазкур халқаро турнирда 13-рақам остида сараланган Станислас Вавринка биринчи турда Алберт Рамосни (Испания) 7-6, 7-6 ҳисобида мағлубиятга учратди.
Эътиборлиси, агарда Денис Истомин иккинчи босқичда ҳам муваффақиятга эришса, учинчи босқичда дунё теннис жадвалида карвонбошилик қилаётган Рожер Федерер (Швейцария) билан баҳс юритиши мумкин. Бу учун Федерер ҳам иккинчи босқичда тайпейлик Ен-Сун Лю қаршилигини енгиши лозим.
Ёдингизда бўлса, Лондон (Буюк Британия)да бўлиб ўтган Олимпиада ўйинларида Денис Истомин учинчи босқичда Рожер Федерер билан рўбаро келган эди. Гарчи ўша учрашувда швейцариялик теннисчи 7-5, 6-3 ҳисобида ғалаба қозонган бўлсада, ўйиндан кейинги матбуот анжуманида Федерер ушбу учрашув муросасиз курашларга бой бўлганлигини ҳамда Денис Истомин ўта кучли қаршилик кўрсатганлигини таъкидлаб ўтган эди.
Агарда воқеалар ривожи биз кутгандек бўлиб чиқса, Истомин – Федерер иштирокида яна бир ажойиб баҳсни кузатиш имкониятига эга бўламиз.
Шавкат Жалилов
Маданият ва спорт ишлари вазирлиги матбуот хизмати
