Лионель Мессининг Европадаги сафари якунига етди (ҳозирча). Аргентиналик футболчи чўзиб ўтиришни истамади ва Дэвид Бекхэм бошқарувидаги «Интер Майами» билан шартнома имзолади. Мессининг ўзи эса «Барселона»га қайтишни истаганди, аммо футболчининг отаси ва агенти Хорхе Месси "кўк-анорранглилар" президенти Жоан Лапорта билан гаплашгач, ўғлининг "Камп Ноу" қайтиш эҳтимоли жуда паст эканини билди. Натижада Лео MLS вариантина танлади.

Хўш, Мессининг «Барса»га ўтиши нима учун амалга ошмади?

«Барселона» Месси билан шартнома имзолаш учун режа ишлаб чиққанди. Унга кўра, клуб харажатларни камайтириб, даромадларни ошириши керак эди. Бунинг учун эса вақт талаб этиларди. Футболчи эса кутишни истамади ёки бу режа охир-оқибат иш беришига кўзи етмади.

"Барса" таркибда юқори маош олувчи футболчилар — Серхио Бускетс ва Жорди Альба билан хайрлашиб, харажатларни қисқартирди. Аммо бу ҳали етарли эмас эди. Жамоа трансферлар орқали камида 100 миллион евро ишлаб топиши зарур эди. Бунинг учун баъзи ўйинчилар — Рафинья, Ферран Торрес, Ансу Фати, Франк Кессиэ трансферга қўйилиши керак эди. Шу билан биргаликда, Месси ортга қайтиши учун ўйинчиларнинг маошлари камайтирилиши талаб этиларди.

Лионель буларнинг барчасидан хабар топгач, ўзи туфайли қолган ўйинчилар жабр чекишини ёки молиявий йўқотишга учрашини истамади.

Шу туфайли Месси олдида 2 та асосий йўл қолди: ё Саудия Арабистони, ёки Америка. Молиявий жиҳатдан "Ал-Ҳилол" варианти жуда яхши бўлса-да, Месси оиласи учун қулай ҳисобланган "Интер Майами"ни танлади.