«Интер Майами» стадиони фаррош сифатида хизмат қилаётган ходим Мессидан дастхат олгани учун ишдан бўшатилди.

Колумбиялик Кристиан Саламанка сўнгги бир ярим йилдан буён Майамида яшаб, стадионда фаррошлик қилаётганди. У Леонель Мессини кўриб қолиб, ундан дастхат олди. Бу иши учун у компаниядан ҳайдалди.

«Мен автобуслар тўхташ жойидаги ҳудудда жойлашган ҳожатхонани тозалаётгандим. Бахтимга, кўча чиққан пайтимда автобус келди ва ундан ўйинчилар туша бошлади. Месси эса энг охирида автобусдан тушди. Мен: «Эй, жаҳон чемпиони!», дея бақирдим. У менга қаради.

Мен ишчи формамни ечдим ва ичимда Аргентина терма жамоаси футболкасини кийиб олгандим. У мазкур футболкага дастхат қўйди.

Кейин эса қўриқлаш ходимлари келишди ва мени ишдан бўшатишди. Бу шунга арзийдиган иш», – деди Кристиан.

Маълумотларга қараганда, стадион ходимларига иш вақтида клуб юлдузлари билан суратга тушиш ва улардан дастхат олиш тақиқланган.