20 ноябрь куни ЎФФ анжуманлар залида Ўзбекистон ёшлар терма жамоаси бош мураббийи Аҳмаджон Мусаев иштирокида матбуот анжумани бўлиб ўтади. Анжуман соат 11:00да бошланади. Унда ЎФФ Терма жамоалар маркази директори Асқар Толибжонов ҳам иштирок этади.

Аҳмаджон Мусаев қўл остидаги Ўзбекистон ёшлар терма жамоаси 3-17 ноябрь кунлари БААда бўлиб ўтган 2012 йилги U-19 Осиё чемпионати баҳсларида муваффақиятли иштирок этиб, ўз олдига қўйилган вазифа – 2013 йили Туркияда ўтказиладиган U-20 Жаҳон чемпионати йўлланмасини қўлга киритди. Ўзбекистон ёшлар терма жамоаси 2012 йилги Осиё чемпионатидаги иштирокини ярим финал босқичида якунлади – Мусаев шогирдлари финал йўлланмаси учун ўйинда, охир-оқибат мусобақа чемпионига айланган Жанубий Корея ёшлар терма жамоасига имкониятни бой беришди.

Қайд этиш жоиз, Аҳмаджон Мусаев ўзбек футболи тарихида ёшлар ўртасидаги жаҳон чемпионати йўлланмасини қўлга киритган учинчи мураббийга айланди. Бунгача, Виктор Борисов шогирдлари 2003 йилги, Аҳмаджон Убайдуллаев шогирдлари 2009 йилги U-20 Жаҳон чемпионати йўлланмаларини қўлга киритишган эди.