Мадриднинг “Реал” клуби ярим ҳимоячиси Жуд Беллингем елкасидан олган жароҳати туфайли икки ҳафта майдонга туша олмаслиги хавфи бугун, 11 ноябрь куни маълум бўлди. Бу ҳақда журналист Аранха Родригес хабар берди.
Манбага кўра, "Қироллик клуби" футболчининг жароҳати ҳақида Англия футбол ассоциациясини (FA) аллақачон хабардор қилган, шу сабабли у 2024 йилги Европа чемпионати саралашида Англия терма жамоасининг бўлажак ўйинларини ўтказиб юбориши мумкин. Бироқ, FA ҳозирча мустақил равишда мавжуд вазиятни ўрганиб, Беллингемни терма жамоага чақириш зарурати тўғрисида қарор қабул қилмаган.
Эслатиб ўтамиз, 17 ноябрь куни Англия терма жамоаси Мальта билан ўйин ўтказади. Кейин, 21 ноябрь куни Гарет Саутгейт шогирдлари Шимолий Македонияга қарши баҳс олиб боради.
