Сербия алоҳида республика сифатида илк бор Европа чемпионатига йўлланма олди.
Драган Стойкович шогирдлари бугун Болгария билан дуранг ўйнади (2:2), Черногория Венгрияга имкониятни бой берди (1:3).
Якуний тур натижаларига кўра, венгерлар саралаш G гуруҳида биринчи ўринни (18 очко), серблар иккинчи (14), черногорияликлар учинчи (11) ўринни эгаллади. Сўнгги икки ўринни Литва (6 очко) ва Болгария (4) эгаллаб турибди.
Венгрия аллақачон Евро-2024 йўлланмасини қўлга киритган. Бу гуруҳдан ҳеч ким плей-оффга чиқа олмади.
Сербия охирги марта 2000 йилда Югославия таркибида Еврода иштирок этган. 1992 йилда Югославия Социалистик Федератив Республикаси парчаланганидан сўнг, иккита республика: Сербия ва Черногорияни ўз ичига олган Югославия Федератив Республикаси ташкил топди.
Шу билан бирга, серблар сўнгги икки жаҳон чемпионатида – 2018 ва 2022-йилларда ўйнаган.
