Охирги маълумотларга қараганда, «Реал» Килиан Мбаппе трансферидан батамом воз кечган кўринади.
Зеро, матбуот хабарларида айтилишича, мадридликларда франциялик голеадордан юз ўгириш учун 3та залворли сабаб бор ва улар маълум. Боз устига, «Мадрид»нинг Мбаппега дахлдор ёмон хотиралари қисқа ҳам эмас.
Cadena SER хабарига қараганда, Килиан Мбаппе келаси ёз «ПСЖ»дан кетишга қарор қилган тақдирда ҳам, «Реал Мадрид» раҳбарияти уни сотиб олишга уринмайди. Таъкидланишича, мадридликлар мавжуд ҳолатни обдон таҳлил қилиб, франциялик ҳужумчи трансферидан воз кечишни тақозо этадиган 3та залворли сабаб топишган.
Биринчи сабаб - Мбаппенинг маоши. Килиан янги клубидан йилига камида 20 миллион евро миқдорида маош ва катта бонусларни ўз ичига олган шартнома талаб қилади кутилишича. «Реал» раҳбарияти эса аллақачон ички маош лимитини тасдиқлаган. Унга кўра, футболчининг йиллик иш ҳақи 10 миллион евродан ошмаслиги керак. Мисол учун, айни пайт феноменал ўйин кўрсатаётган Жуд Беллингем йилига 9 миллион евро олади.
Иккинчи сабаб - клуб сиёсати. «Реал Мадрид»да клуб фалсафаси ва маданиятини тушунадиган футболчиларни ёшлигидаёқ таклиф этиш сиёсати бор. Мақсад - бошидан ёш иқтидорларда «Қироллик клуби»га нисбатан кучли муҳаббат уйғотиш. Килиан Мбаппе эса келаси йили 26 ёшга тўлади ва шу критерия бўйича клуб сиёсатига тўғри келмайди.
Учинчи сабаб - ёмон хотиралар. «Реал» 2022 йилнинг ёзида кузатилган воқеаларни ҳали унутмаган, албатта. Ўшанда Килиан Мбаппе эркин агент мақомида Испания гранди сафидан жой олишга розилик берган ва клуб унинг таништирув маросимига ҳам тайёргарлик кўра бошлаганди. Бироқ франциялик футболчи сўнгги лаҳзаларда фикрини бирдан ўзгартириб, «ПСЖ» билан янги йирик шартнома тузди. Мадридликлар бу хатти-ҳаракатни «Қироллик клуби»га нисбатан хиёнат ва ҳурматсизлик сифатида қабул қилишгани ҳам рост.
