Oxirgi ma’lumotlarga qaraganda, «Real» Kilian Mbappe transferidan batamom voz kechgan ko‘rinadi.

Zero, matbuot xabarlarida aytilishicha, madridliklarda fransiyalik goleadordan yuz o‘girish uchun 3ta zalvorli sabab bor va ular ma’lum. Boz ustiga, «Madrid»ning Mbappega daxldor yomon xotiralari qisqa ham emas.

Cadena SER xabariga qaraganda, Kilian Mbappe kelasi yoz «PSJ»dan ketishga qaror qilgan taqdirda ham, «Real Madrid» rahbariyati uni sotib olishga urinmaydi. Ta’kidlanishicha, madridliklar mavjud holatni obdon tahlil qilib, fransiyalik hujumchi transferidan voz kechishni taqozo etadigan 3ta zalvorli sabab topishgan.

Birinchi sabab - Mbappening maoshi. Kilian yangi klubidan yiliga kamida 20 million yevro miqdorida maosh va katta bonuslarni o‘z ichiga olgan shartnoma talab qiladi kutilishicha. «Real» rahbariyati esa allaqachon ichki maosh limitini tasdiqlagan. Unga ko‘ra, futbolchining yillik ish haqi 10 million yevrodan oshmasligi kerak. Misol uchun, ayni payt fenomenal o‘yin ko‘rsatayotgan Jud Bellingem yiliga 9 million yevro oladi.

Ikkinchi sabab - klub siyosati. «Real Madrid»da klub falsafasi va madaniyatini tushunadigan futbolchilarni yoshligidayoq taklif etish siyosati bor. Maqsad - boshidan yosh iqtidorlarda «Qirollik klubi»ga nisbatan kuchli muhabbat uyg‘otish. Kilian Mbappe esa kelasi yili 26 yoshga to‘ladi va shu kriteriya bo‘yicha klub siyosatiga to‘g‘ri kelmaydi.

Uchinchi sabab - yomon xotiralar. «Real» 2022 yilning yozida kuzatilgan voqealarni hali unutmagan, albatta. O‘shanda Kilian Mbappe erkin agent maqomida Ispaniya grandi safidan joy olishga rozilik bergan va klub uning tanishtiruv marosimiga ham tayyorgarlik ko‘ra boshlagandi. Biroq fransiyalik futbolchi so‘nggi lahzalarda fikrini birdan o‘zgartirib, «PSJ» bilan yangi yirik shartnoma tuzdi. Madridliklar bu xatti-harakatni «Qirollik klubi»ga nisbatan xiyonat va hurmatsizlik sifatida qabul qilishgani ham rost.