"ПСЖ" ва Италия терма жамоаси дарвозабони Жанлуиджи Доннарумма манфаатларини ҳимоя қилувчи агент Энцо Райола мижози дунёнинг энг яхши дарвозабони эканини таъкидлаб, футболчи ўз вақтида "Реал" билан шартномадан бош тортганини айтди.

Доннарумма шартномаси 2021 йилда тугаши сабабли "Милан"ни тарк этди ва "ПСЖ"га эркин агент сифатида қўшилди. Доннарумманинг "Милан" дарвозасидаги ўрнини франциялик Майк Меньян эгаллади.

"Милан" кутишни истамади, шунинг учун улар худди биз каби қарор қабул қилишди. Меньян жуда яхши ўйнайди. У Франция терма жамоасининг асосий посбони ва Италияда кўп ютуқларга эришди.

Бироқ, уни Доннаруммадан яхшироқ деб айтмаган бўлардим. Мен бўрттириб айтмоқчи эмасман, лекин менимча, уларни ҳозир солиштириб бўлмайди. Доннарумма дунёнинг энг яхши дарвозабони, у билан ишлаган барча дарвозабонлар мураббийлари шундай дейишади. Улар учун у эришиб бўлмайдиган истеъдод. "Реал" уни 17 ёшида хоҳлаган эди, бироқ у клуб кубоклар кабинетини кўриб, уни "Милан" фойдасига рад этди", - деди Райола DAZN билан суҳбатда.