"PSJ" va Italiya terma jamoasi darvozaboni Janluidji Donnarumma manfaatlarini himoya qiluvchi agent Enso Rayola mijozi dunyoning eng yaxshi darvozaboni ekanini ta’kidlab, futbolchi o‘z vaqtida "Real" bilan shartnomadan bosh tortganini aytdi.
Donnarumma shartnomasi 2021 yilda tugashi sababli "Milan"ni tark etdi va "PSJ"ga erkin agent sifatida qo‘shildi. Donnarummaning "Milan" darvozasidagi o‘rnini fransiyalik Mayk Menyan egalladi.
"Milan" kutishni istamadi, shuning uchun ular xuddi biz kabi qaror qabul qilishdi. Menyan juda yaxshi o‘ynaydi. U Fransiya terma jamoasining asosiy posboni va Italiyada ko‘p yutuqlarga erishdi.
Biroq, uni Donnarummadan yaxshiroq deb aytmagan bo‘lardim. Men bo‘rttirib aytmoqchi emasman, lekin menimcha, ularni hozir solishtirib bo‘lmaydi. Donnarumma dunyoning eng yaxshi darvozaboni, u bilan ishlagan barcha darvozabonlar murabbiylari shunday deyishadi. Ular uchun u erishib bo‘lmaydigan iste’dod. "Real" uni 17 yoshida xohlagan edi, biroq u klub kuboklar kabinetini ko‘rib, uni "Milan" foydasiga rad etdi", - dedi Rayola DAZN bilan suhbatda.
